ම’සිත හැඟුම් පුබුදුවන්න….

2011 ජනවාරි 30 at 3:07 පස්වරු (කැඩපත් පවුර)


 

දුර ඈත තනි තරුවට
මේ සීත රෑ තනිව හිඳ
කොඳුරනා රස රහස
රැගෙන යනු මැන
පවන් රොදේ
හීන් සැරේ
කනට ඇගේ මුමුනලා
කියා ගන්න බැරිව ලතැවෙනා
ම’සිත උපන් ආදරේ
ඇගේ කනේ තබාලා
රැගෙන එන්න
ඇගේ උනුහුම් සුසුම් පොදක්
සීතලට ගැහෙන
ම’සිත හැඟුම් පුබුදුවන්න….

Permalink ප්‍රතිචාර 3

පුංචි බාලිකාවියේ……..

2010 ජූනි 19 at 8:42 පෙරවරු (කැඩපත් පවුර)


වෛවාරණ කමිස කෑලි

ඉනෙන් හැලෙන ඩෙනිම් කලිසම්

ඇඟ ලා ගෙන උජාරුවට

දඬු මොනරේ පිට නැග ගෙන

තක්සලාවෙ වැටෙන් එහා

මාන බලති ප්‍රේම කුරුල්ලෝ

මලවිගෙ මල් හීසර විද

ඩැහැ ගන්නට නුඹෙ හිත් මල…..

මල් හී සර වැදුනු කලට

උන්නෙ ඇඟේ පිත්තල තඹ තහඩු ගොන්න

පෙනෙයි නුඹට රන් රිදියෙන්

පුංචි බාලිකාවියේ…..

වහං වෙයං හනික පොත් පිටු අතරේ…..

Permalink ප්‍රතිචාර 20

පොඩි සාදු…….

2010 ජූනි 15 at 9:28 පෙරවරු (කැඩපත් පවුර)


 

බෝ මළුවේ මද සුළඟේ

බවුන් වඩන පොඩි සාදූ

බණ මඩුවේ දැහැමි සිතින්

බණ දෙසනා පොඩි සාදූ

කසාවතින් සැරසුණු නුඹ

දකිනා සඳ,

නිල් වන් ගුවන පුරා

සැහැල්ලුවට පාවී ගිය

සරුංගලය සේ

වෙල් එළියේ දුව පැන දඟ කළ

මගෙ සකි සඳ සිහිවේ මට……….

Permalink ප්‍රතිචාර 24

කාසි පනම් නැති දෝතට………..

2010 ජූනි 7 at 3:28 පස්වරු (කැඩපත් පවුර)


දේදුන්නේ පාට පාට

සමනළයින් රෑන් රෑන්

එහෙ ඉගිලෙති,

මෙහෙ ඉගිලෙති

ආසයි මට ඉගිලෙන්නට

රන් සමනළයින් අතරේ

මල් පෙති වල පාට පාට

දෝතින් ගෙන ඇඟ තවරා

මද පවනේ පාවී යන

මල් පෙති විලසින

ආසයි මට පාව යන්න

සුවඳ හමන මල් පෙති අතරේ

කාසි පනම් නැති දෝතට

ආසාවන් බර වැඩි හින්දා

සුවඳ හමන මල් පෙති අතරේ

තටු සලනා සමනළයින් දෙස

දෙනෙත් අයා බලා හිඳින්නම්………..

Permalink ප්‍රතිචාර 15

බුදු පියාණනේ……..

2010 මැයි 23 at 3:53 පස්වරු (කැඩපත් පවුර)


අදැහැමි සිතිවිල්ලෙන්

දැවෙන තැවෙන

මනුසත් සිතිවිලි

මෙත් සිසිලෙන් තෙමා

නිවා සනහා,

අමා දම් රස

මනුසත් සිත් තුළ

වඩා හිඳුවා,

කරුණා රසයෙන්

ලොව නහවා ලන්නට

මුදු බුදු බණ පදයක්

දෙසා වදාළන්නට

වඩිනු මැන බුදු පියාණනේ…………….

Permalink ප්‍රතිචාර 9

මෙහෙණියක සේ…….

2010 මැයි 9 at 12:46 පස්වරු (කැඩපත් පවුර)


අනියත මනු ලොව

දෝතින් ගෙන

මිරිඟුව වෙත දිව ගිය

මුවැත්තියයි මා එදවස

දැහැන් ගත සිත පාමුල

දිලෙන පහන් වැට සේ

සැලේ ඔබෙ රුව

මගේ නෙත අභිමුව

පුරන්නට පෙම් පාරමී දම්

කමටහන් වූ නුඹ ම එ දවස

කමටහන් විය මෙදින

පුරන්නට පාරමී දම්

සසර කතරින් එතෙර වන්නට

Permalink ප්‍රතිචාර 12

ජීවිකාව අහිමි වූ ම’හිමි සඳටයි……

2010 අප්‍රේල් 8 at 5:44 පස්වරු (කැඩපත් පවුර)


විසල් නුග සෙවන

නුඹයි,

ම’ සිතට

සීත සෙවන දුන්……..

 

හමන මාරුතය

ඉඩෝරයේ,

දවා හල

නුඹේ අතු පතර

දකින කල

කය නොව ම’සිත

දැවේ තැවේ

නුඹ නමින්……..

Permalink ප්‍රතිචාර 9

කමටහන් වුයේ කිම…….???

2010 අප්‍රේල් 5 at 10:34 පෙරවරු (කැඩපත් පවුර)


අඩ අදුර රජයනා

අවන්හල මැද

නෙක පැහැති රූ රටා මැව්

පහන් සිලට මුවා වී

බහු රූ කෝලමින්

පිනවමින් නෙත සිත

තෙපලමින් මුසා බස්

ඉදුල් වැටි අගින් ගෙන

නුඹ ම කෑ බත් පත

යාචකයකු බුදින කල

වීදියේ කොනක හිඳ

කමටහන් වුයේ කිම…..???

එයම පමණක්

පිළිකුල් බවුන් වඩන්නට

Permalink ප්‍රතිචාර 6

කිරි කඳුළක්

2010 අප්‍රේල් 2 at 4:01 පෙරවරු (කැඩපත් පවුර)


වියළී ගිය දෙතනේ

කිරි සොයනා පුතුගේ

ඇඬුම් හඬට

එරෙන්න කිරි නැති මුත්

පුතුනේ……..

ඇවිලේ ගින්දර

මගෙ පපු කුහරේ

කිරෙන් නොව කඳුළින්

තෙමෙනා මගෙ දෙතනෙන්

රූරා වැටෙන කඳුළු බිදු වල

ලුනු රස මැකී

කිරි රස දැනේවා

නුඹට

මගෙ පුතුනේ…….

Permalink ප්‍රතිචාර 9

නුඹ මා සතු වී නම්….

2010 මාර්තු 11 at 5:36 පස්වරු (කැඩපත් පවුර)


 

අහස් වියන පුරාවට

තරු මල්

කුරුටු ගෑ පින්සල

නුඹ ,

මා සතු වී නම්

තාරුකා සිතුවම් කරන්නෙමි

මනු සත් ලොවේ

මානව මානවිකා

දෙනෙත් තුළ

කරුණා ගුණයෙන්

නිවී දිලෙන්නට………….

Permalink ප්‍රතිචාර 4

Next page »